Бандани Аллоҳ таолога яқин қиладиган нафл ибодатларининг энг улуғи Қуръонни тафаккур ва тадаббур қилиб, маъноларини англаб, кўп қироат қилиш ва тинглашдир.

Ушбу Улуғ Китобни чуқур диққат-эътибор билан ўқисак, бу Илоҳий Мўъжиза гўё бундан ўн тўрт аср илгари эмас, балки, ҳозир ўзимизга туширилгандай – ҳар бир сўзи ҳаётимизни ҳақиқий инсон бўлиб яшаб ўтишимиз учун ўта зарур сўз эканини пайкаймиз. Зотан бу сўз барча оламларнинг Эгаси, мангу барҳаёт Оллоҳ таолонинг ҳеч қачон ўлмайдиган сўзидир. Мен – бандаи ожиз ушбу Улуғ сўз маъноларини Сиз азизларга етказмоқчи бўлдим. Агар тўғри етказа олган бўлсам, бу Ёлғиз Яратганнинг мархаматидан, ўтиб кетган хатолари бўлса, бу менинг нуқсонларимдир. Мен Оллоҳ таолодан ушбу Китобни ўқиган ҳар бир инсонни Ўзининг ҳақ йўлига ҳидоят қилишини сўрайман хамда сизлардан Китобни ўқиб, Каломуллоҳ маънолари билан ошно бўлган соатларингизда, агар ёдингизга келса менда Қуръони Каримга илк муҳаббат уйғотган устози аввалларим бўлган марҳум Ота ва Онамнинг ҳақларига дуойи хайр қилишларингиздан умидвор бўлиб қоламан.

Шайх Алоуддин Мансур